Ils privels tar ina crudada da crappa dependan dapli da la furma dal crap che da la massa. Quai han perscrutaders da la Scola politecnica federala ETH e da l'Institut federal per la perscrutaziun da naiv e lavinas SLF communitgà.
Crappa cun furma da roda svieschan pli savens dretg u sanester sin lur via da la plaunca giu che crappa quadra. Uschia saja l'areal da collisiun pussaivel bler pli grond cun crappa radunda che cun quadra, resulta dal studi ch'ils perscrutaders han publitgà en il magazin «Nature Communications».
Durant quatter onns han ils scienziads e las scienziadas experimentà cun crappa da betun sin ina plaunca datiers dal Pass dal Flüela (guarda video sut). La crappa hani equipà cun sensurs e cumpareglià spertadad, areal da collisiun, autezza dals sigls e trajectorias da crappa cun differentas furmas e massas.
Ils resultats da quests experiments vegnan uss implementads en in program da simulaziun dal SLF. Uschia duess ins pudair analisar meglier il privel da crudadas da crappa e pudair optimar las mesiras da schurmetg. Las datas vegnan publitgadas sin la plattafurma «Evidat» a liber access dad auters perscrutaders.
Ord l'Archiv
2019 ha il Telesguard visità il perscrutader Andrin Caviezel.