Siglir tar il cuntegn
Inhalt

Svizra ETH relascha ina professura

La Scola politecnica federala da Turitg ha instradà la procedura da relaschada pervi da renfatschas da mobbing cunter ina professura. In'inquisiziun neutrala vegn a la conclusiun che la professura d'astronomia saja sa cuntegnida fermamain cuntrari als duairs.

bajetg da la ETH Turitg ord vista d'utschè
Legenda: Sco para hai dà grevs surpassaments davos ils mirs da l'ETH da Turitg. Keystone

Il president da l'ETH, Lino Guzzella, vegn cità en ina communicaziun, che quai saja in cuntegnair inacceptabel. El ha accentuà che quai saja in'excepziun e betg la regla.

Il rapport administrativ cusseglia da schliar il contract da lavur e fa er propostas co impedir en l'avegnir tals incaps. Il favrer 2017 è la direcziun da scola vegnida infurmada davart cas da mobbing a l'institut per astronomia. Ina professura, che ha bajegià si l'institut ensemen cun ses um, duai avair schicanà sur diesch onns ils doctorands e las doctorandas. En diversas medias rapportan anteriurs doctorands ch'ins saja vegnì perina cun la professura sulet sch'ins saja sa suttamess ad ella.

Professura refusa las renfatschas

Sco mesira immediata èn ils doctorands pertutgads vegnids partids tiers ad in'autra persuna. Vitiers è l'institut per astronomia schlià e parts da quel èn vegnids integrads en in auter institut. Cunter sia relaschada vul la professura sa defender cun tut ils meds, quai fa a savair ses advocat. Ella refusa las renfatschas e discurra d'ina doctoranda che veglia far vendetga sco er d'in cumbat da pussanza aifer l'ETH.

RR novitads 15:00