Siglir tar il cuntegn

Svizra Euro puspè sur 1,20 francs – er pervi d'elecziuns

Per l'emprima giada dapi trais onns ha l'euro surpassà la marca che valeva fin il 2015 sco curs minimal. Elecziuns main extremas che spetgà pudessan esser in motiv per quest svilup.

Legende: Audio Saira: Tge facturs èn responsabels per il franc debel? abspielen.
2:21 min, Actualitad dals 20.04.2018.
  • L'euro ha surpassà la gievgia l'emprima giada dapi trais onns la marca dad 1,20 francs.
  • Raschuns èn tranter auter la buna situaziun economica en l'UE e che diversas elecziuns da l'onn passà n'èn betg stadas uschè extremas sco spetgà.
  • Experts spetgan che l'euro pudess era surpassar la marca dad 1,25 francs.

Suenter che la banca naziunala svizra aveva ils 15 da schaner 2015 decidì d'abolir il curs minimal dad 1,20 francs per euro, era il franc mai pli stà uschia debel. Quest'emna ha il curs dentant puspè surpassà la marca dad 1,20 francs. Responsabel per quest svilup è betg in singul factur, mabain in'entira rotscha. Tenor l'expert da finanzas Damian Gliott è in dals facturs principals che l'economia europeica sa chatta per il mument en ina buna fasa. Ed er las elecziuns en l'Uniun europeica sajan stadas main extremas che spetgà. Quai per exempel en la Frantscha, la Germania, l'Italia u l'Ollanda. Ed er in auter president contribueschia a la svalitaziun dal franc svizzer: Cunquai che Donald Trump vala sco president nuncalculabel, vegnia investì pli pauc en il dollar e dapli en l'euro.

Forsa perfin in curs dad 1,25

Da prognostitgar, co ch'il curs vegnia a sa sviluppar, n'è tenor Gliott betg uschia simpel. Savens tegnia ina devisa in temp in trend. Ed el possia s'imaginar ch'il curs cuntanschia ina marca dad enfin 1,25 francs. Causa als problems en l'Europa, che sajan anc adina betg schliads, saja el sceptic, quant ditg ch'il franc restia sur u tar il curs minimal dad 1,20.

Anc nagina euforia

Plaschair vi da quest svilup dal curs pudessan cunzunt ils turistichers avair. Pertge il franc svizzer ha fatg grev al turissem svizzer ils davos onns. Schebain Clemens Bartlome da Grischun vacanzas, sco er il president da l'hotelleria svizra, Andreas Züllig, reageschan dentant betg cun euforia. Cun resultats possian ins mo spetgar sch'il curs saja enfin il proxim enviern er anc bun.

Il svilup dal curs è per franc fitg positiv, siglir ils cucuns laschain nus dentant betg.
Autur: Clemens BartlomeManader marketing grischun vacanzas

Mo in bun curs na tanschia betg

Ed il curs dal franc na saja betg il sulet factur decisiv per il turissem, èn ils turistichers persvadias. Uschia gioga tenor Bartlome er la situaziun economica da la populaziun, la segirtad politica u er il basegn da far vacanzas ina rolla. E per l'hotelleria saja cunzunt er l'aura impurtanta: l'enviern sajan ins dependent da la naiv, la stad da la bell'aura.

Tuttina vegnian ils turistichers a nizzegiar ch'almain in factur, il curs dal franc, saja per il mument positiv. Ins stoppia uss star londervi e mussar a la glieud ch'il pretsch per far vacanzas en svizra saja cumparegliabel u per part perfin pli bunmartgà ch'en l'exteriur manaivel, ha Züllig fitg.

Sa deliberar da l'image avant ch'augmentar ils pretschs

Per sa deliberar da quest image d'esser in pajais memia char, stoppian ins perquai tegnair l'entschatta tegnair attractivs ils pretschs. Pir en in segund zap fetschia lura senn, d'augmentar ils pretschs. A lunga vista saja quai dentant schon la finamira. Pertge il turissem svizzer haja ils davos onns stuì desister a tschertas margas per tegnair bass – ed uschia concurrenzabels – ils pretschs. Questas margas sajan dentant impurtantas per pudair investir.

Franc betg pli uschè attractiv sco devisa da refugi

Betg mo envers l'euro, er envers il dollar è il franc vegnì pli flaivel ier. Quai er perquai ch'il franc è per il mument main dumandà sco valuta d'investiziun. Il franc è numnadamain cunzunt durant temps malsegirs ina valuta dumandada.

RR actualitad 17:00