La qualitad da las medias svizras è sa meglierada. Cumpareglià cun avant dus onns valiteschian blers meds meglier ils fatgs, porschian uschia dapli relevanza e professiunalitad. Patì haja dentant la varietad. A questa conclusiun vegn l'uniun «Qualitad da medias». 37 da 51 titels da medias han pudì augmentar la qualitad e 14 han gì ina perdita da qualitad.
L'emissiun da radio da SRF «Echo der Zeit» ha danovamain cuntanschì posiziun 1 en la rangaziun generala. La megliera gasetta dal di è la NZZ, la megliera da l'emna la WOZ ed il meglier medium da boulevard è watson.ch. Il pli grond progress ha fatg «Le Journal» da Léman Bleu.
Perdita da qualitad tar la «Südostschweiz»
Tenor l'uniun ha la gasetta «Südostschweiz» dentant gì ina perdita da qualitad. Els han cuntanschì tschintg puncts pli pauc ch'anc avant dus onns. Omaduas metodas, pia l'analisa dal cuntegn e l'enquista han mussà ina reducziun da la qualitad. Igl «impact-score» da la Südostschweiz è il pli bass da tut las gasettas quotidianas ed online. Il motiv saja tenor il rapport ch'il focus regiunal da la gasetta resulta en ina pitschna distanza da recepziun ed ina frequenza bassa d'utilisaziun.
