Las datas dals sgols durant la stad mussan che 35% dals sgols en Svizra han gì in retard d'almain 15 minutas. Ultra da quai sajan vegnids stritgads dapli sgols che la media, uschia Oskar de Felice da Flightright envers SRF.
I na vesa betg ora uschè bain.
En cumparegliaziun europeica saja la Svizra il pajais il pli nunpunctual. Tar las annullaziuns sa chatta ella sin plaz quatter.
La differenza envers tschels pajais saja relativamain gronda. En la gronda Bretagna, la Italia e la Ollanda hajan radund 30% dals sgols retard. En la Svezia 20% ed en la Pologna e Spagna radund 15%. Per ils retards en Svizra datti intgins motivs.
Tenor Flightright sa cumuleschian qua tras ils problems ch'i dettia en il traffic aviatic internaziunal. La Svizra cun la situaziun centrala – amez l'Europa – saja pli vulnerabla che pajais a la periferia.
«Sche las plazzas aviaticas fan per exempel chauma en Frantscha, lura ha quai automaticamain in effect sin la punctualitad da las plazzas aviaticas da Genevra e Turitg.» Uschia dettia retards, di il pledader da Skyguide Vladi Barrosa.
Eroport serrà pervi da malauras
Il traffic aviatic europeic na vegn betg mo disturbà da chaumas e stretgas da persunal, mabain er pli e pli fitg da las situaziuns meteorologicas extremas. Quai è sa mussà en spezial er questa stad, sco de Felice di. Ils eroports hajan stuì vegnir serrads pervia da plievgia ferma, urizis u incendis. «Quells èn cleramain ils motiv da quest onn per gronds retards e disturbis», di el.
Ed uschia han las cundiziuns da l'aura extrema era gì in'influenza sin il manaschi da sgol en Svizra. Ils ferms urizis e stemprads han chaschunà a Genevra e Turitg bler dapli sperdita e retards ch'anc la stad passada.
Sfidas tar la spediziun
Sper l'aura e las chaumas internaziunalas datti era problems supplementars per il traffic aviatic svizzer. Cunzunt stretgas tar il persunal en ils pli differents secturs. Tar l'eroport da Turitg mancava temporarmain persunal per la controlla da pass e bagascha.
Plinavant lavuria Swissport, ch'è tranter auter responsabel per il Check-in, al limit. Dapi l'entschatta da l'onn ha Swissport engaschà 1'200 persunas supplementaras. Ina pledadra scriva dentant ch'i vegnia surtut tar stretgas tar la spediziun, sch'ils plans da sgol vegnian midads a curta vista.
Swiss planisescha dapli reservas
La societad aviatica Swiss reagescha sin ils retards cun emplantar dapli reservas, per exempel cun persunal ed aviuns a disposiziun, sco Oliver Buchhofer, manader dal manaschi aviatic, di. «Quai ans permetta, sch’in sgol ha retard, che nus pudain remplazzar quel.» Per la Swiss vai per bler. En cumparegliaziun europeica vala ella ussa sco societad cun bler retards, quai è mal per la reputaziun.