Ils 12 da december 2007 vegn Eveline Widmer-Schlumpf elegida sco cussegliera federala – malgrà ch'ella n'è betg la candidata da la partida. Cun in'acziun bunamain zuppada èsi gartegià a las partidas sanestras e dal center da «stgatschar» Christoph Blocher – in dals chaus da la PPS – or da la regenza. Quell'acziun ha procurà per grondas undas en la politica naziunala.
In palc, indesch Eveline Widmer-Schlumpfs
Il toc da teater cul num «EWS – der einzige Politthriller der Schweiz» na tematisescha dentant betg mo quel di. Tenor ils reschissurs Piet Baumgartner e Julia Reichert duai il toc reflectar las differentas fassetta e puncts da vista da e sin Eveline Widmer-Schlumpf. Il text è ina collascha: Mintga pled che vegn discurrì han protagonistas e protagonists principals da quella giada ubain Widmer-Schlumpf sezza ditg ina giada. Per preschentar las differentas fassetta, giogan indesch differentas persunas la politicra – tuttas vestgidas en blazer grisch e chavels brins.
Andrea Hämmerle: «Grondius»
Da la partida a la premiera è er stà l'anteriur cusseglier naziunal Andrea Hämmerle (PS). Avant 15 onns è el stà in dals tirafils da l'acziun zuppada enturn l'elecziun da Widmer-Schlumpf. Cun plaschair saja el ì a guardar il toc da teater, e cun anc pli grond plaschair saja el sortì dal teater, raquinta Hämmerle ad RTR. Durant la represchentaziun sajan vegnidas endament ad el bleras regurdanzas.
Natiralmain è tut puspè vegnì endament. Gist al di da l'elecziun era la tensiun enorma – uss è quai bunamain sa repetì tar mai.
Surtut il titel dal toc – il sulet thriller politic en Svizra – haja persvas el. In'acziun quasi zuppada saja insatge fitg spezial, surtut en Svizra nua che la politica na saja «betg immens interessanta, ins pudess er dir lungurusa».
