Siglir tar il cuntegn

Header

cuntegn

Examinà sut il microscop Perscrutaders a Losanna scuvieran misteri dad omicron

A perscrutaders da la ETH da Losanna, èsi reussì dad observar la configuraziun dal protein dad omicron quasi sin basa atomara. Quai dastgass purtar novas enconuschientschas davart ils mecanissems cun ils quals la varianta vegn da mitschar da vaccins ed anticorpuls.

Stà pussaivel è quai grazia a microscops d'electrons da gronda prestaziun da l'Universitad da Losanna. Quels tutgan tar ils pli effizients dal mund. Ils novs resultats pudessan furnir impurtantas datas en il cumbat encunter corona e surtut er encunter la varianta omicron.

purtret dal spike-protein en differentas colurs.
Legenda: Il spike-protein en detagl. Cun il model da trais dimensiuns da la varianta pon ils perscrutaders chattar or pertge ch'el mitscha da vaccins ed anticorps. Animaziun dal DCI, il Dubouchet Center of Imaging

Cun agid dal microscop han ins pudì far in purtret dal virus cun ina resoluziun uschè buna sco quai ch'i n'haja anc mai dà. Uschia pon ils perscrutaders gardar sin ils singuls atoms.

Nus pudain uss vesair exact tge mutaziuns da la varianta omicron che pussibiliteschan ad el da mitschar cumplainamain dal vaccin dad AstraZeneca e per part da quel da Pfizer.
Autur: Henning Stahlberg ha endrizzà il Dubouchet Center for Imaging, DCI

Cun vesair pli precis co il protein mutà dad omicron pussibilitescha al virus d'entrar en las cellas da persunas, pudess ins er chattar novas vias per terapias encunter.

«Potenzial nunditg»

Questa scuverta pli pauc ch'in mais suenter ch'ins ha identifitgà la mutaziun dad omicron, saja sco da sa tschentar sin in planet ch'ins ha scuvert paucas emnas avant cun in telescop. Il potenzial da questa tecnologia saja nunditg.

L'analisa da la structura è vegnida publitgada sin la plattafurma publica bioRxiv.org. Scienziads sin l'entir mund han uschia access a las datas e pon duvrar quellas per lur atgnas perscrutaziuns e per testar co la varianta omicron reagescha sin medicaments existents.

audio
Per tadlar curt e cumpact
ord RTR Audio dals 30.12.2021.
laschar ir. Durada: 49 Secundas.

RTR novitads 09:00

Artitgels legids il pli savens