Siglir tar il cuntegn

Header

cuntegn

Expansiun La Rega vul era sgular en il Vallais

L'organisaziun da salvament Rega fa serius cun sia expansiun planisada en il Vallais. Ella ha inoltrà uffizialmain ses dossier da candidatura tar il chantun, suenter che quel aveva scrit ora da nov il salvament or da l'aria sin cumond dal Tribunal federal. Ils documents correspundents sajan vegnids tramess gievgia passada a l'organisaziun chantunala da salvament vallesana ch'è responsabla per la publicaziun, ha communitgà la Rega il glindesdi.

Cun quai fa la Rega concurrenza a l'Air Zermatt ed Air-Glaciers. Il salvament da helicopters en il Vallais è dapi decennis fix en maun da las duas societads ch'èn sa reunidas avant dus onns. En la gronda part da las autras regiuns da la Svizra è la Rega, ch'è bler pli gronda, responsabla per il salvament en l'aria. La Rega che transporta mintg'onn 12'000 pazientas e pazients a bord da lur helicopter da salvament, dispona da 13 basas en Svizra. Air Zermatt ed Air-Glaciers han ensemen quatter basas.

L'incumbensa da sgols da salvament en il Vallais è vegnida scritta ora da nov, perquai che Héli-Alpes, ina pitschna interpresa da Sion, vuleva sa participar cun ses helicopter al dispositiv da salvament vallesan. Il chantun ha refusà l'offerta cun la motivaziun ch'i dettia gia avunda helicopters en il dispositiv. Héli-Alpes è arrivà al tribunal federal. Quel ha decis, ch'il Vallais sto scriver ora da nov ils sgols da salvament.

Gia il december passà aveva la Rega marcà preschientscha en il Vallais. En collavuraziun cun Héli-Alpes ha l'interpresa staziunà in helicopter da salvament a Sion. Tgi che vegn ad esser responsabel per il salvament aviatic en l'avegnir en il Vallais, vegn a sa decider la fin da quest onn.

audio
Per tadlar: Las novitads da las 15:00
ord RTR Audio dals 16.05.2022.
laschar ir. Durada: 2 minutas 37 Secundas.

RTR novitads 16:00

Artitgels legids il pli savens