Malgrà la blera lavur guardan manaders a manadras da scola enavos cuntent sin l'onn da scola 2021/2022 ch'è stà influenzà da la pandemia. Quai resulta d'in studi che, tranter auter, la scol'auta da pedagogia dal Grischun e l'Universitad da Turitg han instradà.
200 manaders e manadras da scola da tut las regiuns linguisticas èn vegnids consultads davart lur experientschas durant l’onn da scola da corona 2021/2022. Durant la pandemia hajan els lavurà stretgamain cun lur collegi. Per surmuntar las sfidas saja la collavuraziun stada centrala e decisiva.
Experientschas sco schanza per il svilup professiunal
Insaquantas midadas vulan ina gronda part da las scolas mantegnair er suenter la pandemia. Restar duajan per exempel la collavuraziun da las persunas d’instrucziun sco er la reflexiun regulara da l’instrucziun. Er l'emprender digital duaja vegnir integrà vinavant en l’instrucziun da mintga di.
