Siglir tar il cuntegn

Header

audio
Corona en Svizra: Il sistem vegn pli spert al limit che spetgà
Or da Actualitad dals 23.10.2020.
laschar ir. Durada: 03:59 minutas.
cuntegn

Expert Ackermann «Las mesiras actualas na tanschan betg»

Las cifras da novas infecziuns en Svizra creschan fitg svelt. Il venderdi ha l'Uffizi da sanadad per l'emprima giada annunzià passa 6'000 novas infecziuns. Experts da la Confederaziun han infurmà a Berna.

  • Il dumber da novas infecziuns en Svizra surpassa cleramain quel dals pajais vischins.
  • I vala uss dad evitar contacts betg necessaris.
  • Adina dapli persunas ston vegnir ospitalisadas pervi da Covid-19.
  • Il squitsch sin il persunal da tgira crescha.
  • La capacitad da testar vegn als cunfins.

Sin la dumonda d'in schurnalist, schebain las mesiras actualas per evitar la derasaziun dal coronavirus tanschian, ha Martin Ackermann, il schef da la task force scientifica, respundì: «Na, nus essan da la persvasiun che quellas na tanschan per bler betg.» Diesch persunas infecteschian il mument 16 autras persunas e quai saja memia bler ed i saja uss da reagir immediat per reducir il dumber da novas infecziuns.

video
Martin Ackermann: «Las mesiras actualas na tanschan betg»
Or da News-Clip dals 23.10.2020.
laschar ir

Cleramain surpassà ils pajais vischins

Aifer in'emna saja il dumber da novas infecziuns cun il coronavirus pli che sa dublegià. La situaziun saja fitg severa, ha ditg Stefan Kuster da l'Uffizi federal da sanada BAG il venderdi davant las medias da la Chasa federala.

video
Stefan Kuster: «Dapli cas ch'en ils pajais vischins»
Or da News-Clip dals 23.10.2020.
laschar ir

Las cifras en Svizra sajan per exempel tschintg giadas uschè autas sco quellas en Germania. En egl dettia er che la quota da tests positivs saja sur 20% – passa mintga tschintgavel test è pia positiv. Tant pli saja uss da sa tegnair vid las reglas, ha ditg Stefan Kuster.

Nus stuain evitar contacts betg necessaris.
Autur: Stefan Kuster

Pertutgads da novas infecziuns èn tenor Kuster vinavant persunas da tut las vegliadetgnas. Surtut la curva da persunas sur 80 onns creschia fermamain. Er sajan tut las regiuns pertutgadas da l'augment d'infecziuns. L'incidenza da 14 dis varieschia da 190 infecziuns sin 100'000 abitants fin a 1'100 infecziuns per 100'000 abitants.

Adina dapli ospitalisaziuns pervi da Covid-19

Andreas Stettbacher, il delegà da la Confederaziun per il servetsch sanitar coordinà, ha fatg attent sur da l'occupaziun dals letgs en ils ospitals. Il venderdi curt avant las 11:00 era la situaziun la suandanta: Dals 22'239 letgs acuts en ils ospitals eran 16'719 occupads – 710 da quels cun pazients da Covid-19. 5'520 letgs hajan ins uschia anc sin reserva.

Ils ultims dis saja dentant il dumber da pazients da Covid sin staziuns regularas ed intensivas creschì per in factur dad 1,6. Il mardi era quest factur anc tar 1,5.

video
Andreas Stettbacher: Adina dapli pazients da Covid-19 en ospitals
Or da News-Clip dals 23.10.2020.
laschar ir

Las pretensiuns al persunal da tgira creschan

I saja uss da far attenziun ch'il persunal da tgira na vegnia betg en in stadi general d'exauriment, ha avertì Andreas Stettbacher. Ins saja conscient ch'il squitsch sin il persunal da las staziuns intensivas saja spezialmain grond.

Tar las indicaziuns da capacitads da letgs dad ospitals saja mintgamai er resguardà il persunal ch'i dovria, ha ditg Stettbacher.

video
Andreas Stettbacher davart stretgas tar il persunal da tgira
Or da News-Clip dals 23.10.2020.
laschar ir

Capacitad da testar vegn als cunfins

Cun il ferm augment dals novs cas da corona, vegnia la capacitad da testar en Svizra plaunet a ses cunfins. Sch'i giaja uschia vinavant, lura na tenschia la capacitad bainbaud betg pli, ha ditg Stefan Kuster. La situaziun saja tendida ed i saja uss necessari da schlargiar la capacitad da far tests. I giaja qua per ils sets da test sezs, capacitads da labor sco er capacitads medicinalas.

video
Stefan Kuster davart las capacitads da testar
Or da News-Clip dals 23.10.2020.
laschar ir

RTR novitads 15:00

Artitgels legids il pli savens

Scrollar a sanestra Scrollar a dretga