Plirs pretschs da products èn creschids ils ultims mais. Uschia han per exempel pliras pasternarias augmentà lur pretschs da paun per 10- 15%. Era ils gronds detaglists èn ids ensi cun ils pretschs: Tranter auter è il café daventà per var 13% pli char. Tenor Peter Moser, docent e manader scientific al center per perscrutaziun politic-economica a la Scola auta spezialisada dal Grischun, è il motiv cler:
Il ferm augment per il pretsch da furment è surtut pervia da la mala racolta.
In ulteriur motiv ch’influenzeschia ils pretschs auts saja l'ieli mineral. Uschia creschan era ils custs da producziun ed il transport. Tge che na gioga dentant betg uschè ina gronda rolla, saja l'inflaziun, di l'expert. Quella saja en Svizra mo tar 1,5%, fertant che l’UE è gia sur 5%. Quai haja era da far cun il ferm franc svizzer: Quel minimeschia numnadamain la chareschia che saja avant maun en auters pajais. Uschia n'èn effects da l'inflaziun anc betg propi visibels tar ils pretschs svizzers.
Sch'ins guarda sin la statistica da l'index naziunal dals pretschs da consum da l'Uffizi federal da statistica, sajan mangiativas dal 2021 schizunt vegnidas pli bunmartgadas en congual cun l'onn 2020.
Nus percepin augments da pretschs bler pli ferm tar products che nus cumprain mintga di, era sch’els fan mo ina pitschna differenza.
Prognosas per il futur sajan adina mo speculaziuns, di Peter Moser. El pensa dentant ch'ils pretschs vegnian a restar anc in temp auts. Suenter la proxima racolta vegnan quels puspè a sa sbassar.