Siglir tar il cuntegn

Header

video
Mathys: «Nagin effect negativ pervi da las schluccadas l'avrigl»
Or da News-Clip dals 05.05.2021.
laschar ir
cuntegn

Experts da la Confederaziun «I dat bunas raschuns da restar optimistic»

Il dumber da novas infecziuns giaja plaunet enavos. Er grazia al fatg che adina dapli persunas vegnian vaccinadas. Da far attenziun saja però al dumber da pazients che sa tschentian sin las staziuns intensivas. Per l'ina sajan quai relativamain blers pazients e pazientas e per l'autra pli giuvens.

Las schluccadas da l'avrigl n'hajan fin uss anc betg influenzà negativamain la situaziun epidemiologica. Patrick Mathys, il manader da la secziun management da crisa e collavuraziun internaziunala tar l'Uffizi federal da sanadad BAG, valitescha plinavant sco signal positiv che er las examinaziuns d'auas persas mussian in sumegliant maletg da la situaziun sco las autras furmas da survegliar il svilup da la pandemia. Er vegnian ils tests d'auas persas extendids, actualmain sajan sis sereneras da la partida.

Situaziun sin las staziuns intensivas fa quitads

Actualmain sajan cunzunt ils plazs intensivs en la regiun da Turitg occupads per gronda part. Tut en tut sajan bun 31% dals pazients e pazientas sin las staziuns intensivas, cas da Covid-19 – cun ina tendenza levamain engiu.

Malgrà che la situaziun saja sa megliurada in zic, saja il squitsch per il persunal anc adina grond. Quatter novs letgs intensivs dovrian 12 fin 16 persunas da tgira spezialisadas, uschia Urs Karrer, il vicepresident da la taskforce naziunala e medi a l'ospital chantunal da Winterthur. Sco problematic vesa el cunzunt che pazientas e pazients sin las staziuns intensivas vegnian adina pli giuvens – actualmain sajan quai savens persunas tranter 40 e 60 onns. Cunquai che bleras persunas pli veglias sajan uss vaccinadas, tutgia il virus uss pli savens quellas pli giuvnas anc betg vaccinadas. E la varianta britannica dal virus che domineschia uss, sa derasia pli spert.

video
Media chantunala Berna: «Stain dar attenziun da las capacitads»
Or da News-Clip dals 05.05.2021.
laschar ir

In ulteriur problem: Pervi dals pazients e pazientas da corona sin las staziuns intensivas veginan anc adina bleras autras operaziuns spustadas – actualmain en il rom da sis mais. Quai muntia per il persunal ch'il squitsch restia era anc grond sche la situaziun da corona sa megliereschia. Lura saja numnadamain da prender suenter autras operaziuns.

RTR novitads 15:00

Artitgels legids il pli savens

Scrollar a sanestra Scrollar a dretga