Exposizun: Grönlanda 1912 - Alfred de Quervain – in scienzià ed aventurier

Quest'emna ha il Museum naziunal svizzer a Turitg avert l’exposiziun ch’è deditgada ad Alfred Quervain. Il scienzià ha perscrutà da sias uras glatschers e sias mesiraziuns servan anc oz sco basa per cumparegliaziuns.

audio

Alfred de Quervain, perscrutader da la Grönlanda avant 100 onns

04:42 min, ord Actualitad dals 06.02.2020.

laschar ir. Durada: 4 minutas 42 Secundas.

1 / 6

Legenda: Dunnas dad Inuit cun lur uffants fotografadas durant l'emprima expediziun il 1909. Biblioteca ETH

2 / 6

Legenda: Cun dus teams è Alfred de Quervain ì en Grönlanda. In ha perscrutà la costa da l'insla, l'auter team ch'ins vesa qua sin la fotografia ha traversà l'insla. Da sanester a dretg: il medi Hans Hössli, l'architect Roderich Fick, l'inschigner Karl Gaue ed il manader da l'exposiziun Alfred de Quervain. Biblioteca ETH

3 / 6

Legenda: L'arctica sco desert da glatsch privlus – las fotografias eran adina era inscenaziun per ils lecturs a chasa. Biblioteca ETH

4 / 6

Legenda: Miniaturas ch'ils Inuits han taglià or da dents da chavals da mar – l'expediziun dal 1912 ha era fatg perscrutaziuns etnologicas e purtà a chasa tals objects. Collecziun privata

5 / 6

Legenda: Il bastiment d'expediziun a la costa da la Grönlanda il 1912. Biblioteca ETH

6 / 6

Legenda: Las fotografias sin plattas da glas èn vegnidas coluradas tenor l'instrucziun dad Alfred de Quervain – qua il bastiment d'expediziun «Fox» cun bandiera svizra. Biblioteca ETH

Ils ultims onns èn ils scienziads sa fatschentads cun la digren dals glatschers. Era dal temp dad Alfred de Quervain stevan ils glatschers en il center da la perscrutaziun. Ma per autras raschuns: En il 19avel tschientaner avevan ins tema dad in nov temp da glatsch.

audio

Las perscrutaziuns dal glatsch en la Grönlanda avant 100 onns

04:33 min, ord Actualitad dals 06.02.2020.

laschar ir. Durada: 4 minutas 33 Secundas.

NZZ ha sponsurà l'expediziun

Perquai era l’expediziun svizra en Glönlanda il 1912 ina sensaziun. Betg mo la scienza s’interessava per las datas dal giuven geofisicher, era ils lecturs da gasetta eran laghegiads da leger dad aventuras dal nord.

Damai che la Confederaziun n’ha betg gidà a finanziar l’expediziun, ha Alfred de Quervain fatg in contract cun la NZZ. Lezza ha pajà ina terza dals custs e survegnì persuenter il dretg da rapportar exclusiv da l’expediziun. Ils artitgels han fatg anc pli enconuschent Alfred de Quervain.

Concurrenza d'in Norvegiais

Gia il 1909 era il scienzià stà en la Grönlanda. Trais onns pli tard è el turnà per traversar l’insla. Gliez aveva en sasez gia il norvegiais Fridtjof Nansen fatg. Perquai stueva la nova traversada dal Svizzer esser pli lunga, pli greva e pli spectaculara che quella dal Norvegiais che aveva traversà la Grönlanda en il sid.

E gliez è la finala era reussì. Cun skis e schlieusas da chauns han Alfred de Quervain e ses cumpogns dumagnà ina traversada da 650 kilometers. Quai n’è betg mo stà strapatschus, mabain per part era privlus. Il davos han els per exempel mo malamain chattà lur deposit cun vivondas.

Preziusas datas

Las datas meteorologicas e glaziologicas che Alfred de Quervain e ses team han rimnà il 1912 èn stadas fitg preziusas per la scienza. Fin oz vegnan ellas nizzegiadas per la perscrutaziun dal glatsch da Grönlanda che vala sco segund grond reservuar dad aua dultscha dal mund.

audio

Grönlanda 1912: L'exposiziun en il Museum naziunal svizzer

03:40 min, ord Actualitad dals 06.02.2020.

laschar ir. Durada: 3 minutas 40 Secundas.

L’exposiziun en il Museum naziunal svizzer a Turitg dura fin ils 19 d’avrigl.

RTR actualitad 07:00