Facultad pro persuna - Svizras e Svizzers restan ils pli ritgs
La populaziun svizra è danovamain vegnida pli bainstanta. Quai cun ina facultad media da passa 550'000 dollars. Tenor il nov «Global Wealth Report» da la Credit Suisse è quai in plus da prest 18'000 dollars cumpareglià cun l'onn passà.
La Svizra è cunquai a la testa da la rangaziun mundiala. Sin plazza dus suondan ils Stadis Unids cun in plus da bunamain 12'000 dollars, lura il Giapun ed ils Pajais Bass cun mintgamai in plus da bun 9'000 dollars.
En Svizra è la facultad media d'ina persuna creschida s'augmentada per 144% dapi l'onn 2000. La raschun saja per gronda part pervi dal franc svizzer pli char.