Ils onns 2003 fin 2015 èn las facultads en Svizra s’augmentadas fermamain. Quai mussan las datas da taglia da quests onns, che l’Administraziun federala da taglia ha analisà. Ed ils experts han constatà che las facultads èn repartidas a moda pli ineguala.
La fin dal 2015 muntava la facultad totala da las chasadas svizras a 1’792 milliardas francs. Quai èn 215’166 francs per abitant.
Svizra centrala top, Grischun pauc enavos
La pli gronda facultad per mintga abitant aveva il chantun Sviz cun 718’473 francs, il chantun Sutsilvania cun 677’401 francs ed il chantun Zug cun 492’311 francs. La pli bassa facultad per abitant aveva il chantun da Friburg cun 99’099 francs.
Il Grischun è sin il 6avel plaz cun ina facultad media per mintga abitant da bunamain 306’851 francs.
Repartiziun pli ineguala
Genevra è il chantun nua che las facultads èn repartidas il pli inegual, hai num en l’analisa da l’Administraziun federala da taglia. La pli pitschna differenza tranter facultads autas e bassas nod’ins en il chantun Uri.
Vis sur l’entira Svizra, han ils pli ritgs pudì profitar dapli da l’augment da las facultads che las persunas cun pauca facultad.
RR novitads 11:00