Las 300 persunas las pli ritgas da la Svizra èn vegnidas anc ina giada per radund 60 milliardas francs pli ritgas. Ensemen possedan ellas 674 milliardas francs. Quai rapporta il magazin «Bilanz». La raschun per quest svilup sajan ils buns affars en bursa.
Anc adina sin plaz 1
La pli ritga famiglia resta la famiglia Kamprad dal fundatur dal concern da mobiglias IKEA. Ella posseda 48 fin 49 milliardas francs.
Sin plaz 2 suonda il Svizzer-Brasilian Jorge Lemann cun 28 fin 29 milliardas. El ha creà il pli grond concern da biera dal mund. Sin plaz 3 èn las famiglias Hoffmann ed Oeri ch’han fundà il concern Roche. Lur facultad vegn stimada sin 24 fin 25 milliardas francs.
4 milliardas dapli che l'onn passà
La facultad da Christoph Blocher, da sia dunna e lur uffants vegn stimada sin 11 fin 12 milliardas francs. Quai èn 4 milliardas dapli che l’onn passà. La raschun principala per quest svilup saja la valur da las aczias da la Ems Chemie che saja creschida, scriva la «Bilanz».
Da las 300 persunas las pli ritgas èn 138 milliardaris. Per pudair far part dals 300 superritgs da la Svizra sto ins avair ina facultad da 100 milliuns francs.
RR novitads 23:00