Davant dretgira stattan dus vischins. Mintgin ha ina terrassa. Sin ina da quellas stat dapi il 2001 in puz da quatter meters quadrats. Tenor il vischin procuria quel puz per «invasiuns da mustgins». Perquai pretenda el ch'il puz stoppia svanir. Davant dretgira districtuala e chantunala da Sviz n'ha el dentant gì nagin success – malgrà in'expertisa privata ed in'inspecziun al lieu da la Dretgira chantunala.
Tribunal federal decida auter
Uss ha il Tribunal federal dentant decis per part en favur dal vischin. Perquai sto la Dretgira chantunala da Sviz examinar, daco e quant fitg che mustgins paran da mulestar – pia in'expertisa.
La dretgira da Sviz aveva refusà da laschar far in'expertisa dal cas. Plinavant n'haja l'accusader betg argumentà bain avunda tge ch'el manegia cun ina «invasiun da mustgins» ed era betg mussà si ch'el saja vegnì piztgà.
Il cas va pia enavos a la Dretgira chantunala da Sviz – che po uss puspè sa fatschentar cun mustgins.
