La Rega vul render ses sgols anc pli segirs e quai cun tecnica da laser. Ella è l’emprima organisaziun da salvament civila che testescha uschè in sistem da laser.
Sco quai che la Rega scriva scannescha in laser permanentamain la zona enturn il helicopter e avisescha ils pilots davart obstachels cun in signal acustic. Plinavant vegn l’obstachel era mussà sin il monitur, scriva la Rega.
Ils sgols da test vegnan fatgs questa primavaira en l’Italia dal nord. La Rega fa quint da duvrar il nov sistem a partir dal 2021.
