Siglir tar il cuntegn

Header

cuntegn

Svizra «Favurisar indigens light» vegn cumplettà

La cumissiun d’instituziuns politicas dal Cussegl dals chantuns ha discussiunà co realisar l’iniziativa d’immigraziuns da massa. Il concept prevesa che las interpresas ston annunziar las plazzas libras e sche candidats pussaivels èn avant maun alura sto ella envidar els ad in discurs.

Suenter discussiuns intensivas ha la cumissiun d’instituziuns politicas dal Cussegl dals chantuns decis ina proposta per realisar l’iniziativa d’immigraziun da massa. Ina maioritad da 6 cunter 2 vuschs, tar 5 abstenziuns, ha decis a favur dal concept proponi dal cusseglier dals chantuns Philipp Müller (PLD) - quai vul dir d’engrevgiar la «favurisaziun d’indigens light». Quai ha il president da la cumissiun Peter Föhn (PPS/SZ) ditg a las medias.

Refusas basegnan in argument

Peter Föhn e Philpp Müller
Legenda: Peter Föhn (dretg) presidiescha la cumissiun, Philipp Müller (sanester) ha pudì far maioritads. Keystone

Tenor il concept da Müller na duajan ils patruns betg sulet annunziar las plazzas libras a l’intermediaziun da lavur, mabain era esser obligads d’envidar ils candidats avant maun ad in discurs. Refusas ston alura vegnir giustifitgadas, e quai betg mo cun flosclas mabain cun arguments individuals, ha accentuà Müller avant las medias.

Pertutgads sajan ils secturs cun ina dischoccupaziun surproporziunala. Il concept na dovria nagins contingents e naginas cifras maximalas, ha accentuà Müller.

Sa cumporta quai cun las cunvegnas cun l’UE?

La fatschenta va uss enavos en il parlament. Il Cussegl dals chantuns vegn alura a tractar la proposta en la sessiun d’enviern. Sch'il concept proponì sa cumporta cun las cunvegnas cun l’UE è dispitaivel tranter experts. Ils gremis da l’UE n’èn era anc betg s’exprimids davart las propostas. L’Uniun europeica pretenda fin uss che la Svizra sto tractar tut las persunas tuttina, quai è fixà en la cunvegna da la libra circulaziun da persunas.

L’iniziativa d’immigraziun da massa sto la Svizra realisar fin ils 9 da favrer 2017.

RR novitads 18:00/20:00

Artitgels legids il pli savens