Il concern agricul, Fenaco, ha gì in onn da record l’onn passà. Il concern, dal qual fan part era la Landi ed il Volg, ha registrà ina svieuta da 7,38 milliardas francs ed in gudogn da bunamain 170 milliuns francs. Surtut il commerzi en detagl haja superà las aspectativas, uschia il concern. Fenaco di però era che quest onn saja pretensius. Quai tranter auter pervi dals pretschs che creschan ferm en il sectur da l’energia e da las materias primas, pervi da la guerra en l’Ucraina.
L'onn passà ha Fenaco investì 147 milliuns francs en infrastructura agricula, 2,4 milliuns han survegnì Start-ups e cooperaziuns scientificas. Ulteriurs 10 milliuns francs ha ina fundaziun survegnì che sustegna projects da dialog tranter citad e champagna.
