Siglir tar il cuntegn

Header

cuntegn

Svizra Ferma plievgia cuntinuescha

Fin la notg sin dumengia da Tschuncaisma datti cunzunt en il nord da las Alps per part plievgia intensiva. Quella pudess chaschunar che auals van surora e che bovas vegnan a val.

Fin uss è il privel d’aua gronda en la Svizra Centrala moderà. Ils nivels da flums pitschens sco la Aa d’Engelberg, ma er pli gronds auals sco il Lai dals Quatter Chantuns u la Reuss creschan vinavant. Bovas e sbuvadas dal terren n’hai fin uss betg dà.

Tenor MeteoNews hai dà 70 liters plievgia per meter quadrat a Lucerna e 79 liters per meter quadrat a Gersau SZ durant las ultimas 24 uras. En il chantun Sutsilvania è la via tranter Alpnachstad e Hergiswil serrada. Blers corps da pumpiers en èn acziun pervi d’aua en chasas u sin pitschnas vias, ha communitgà il corp da polizia da la Svizra Centrala.

Privels pussaivels: auals van surora, bovas

Auals pitschens e mesauns pon crescher e localmain ir surora. Flums pli gronds n’èn betg pertutgads da quai. Dapli detagls davart l’aua gronda chattais vus en il bulletin dals privels natirals dal BAFU. Plinavant po quai localmain dar bovas. La blera plievgia datti vinavant en las Prealps centralas ed orientalas, uschia ch’il privel en questas regiuns è pli grond.

Plievgia tschessa durant notg sin Tschuncaisma

En la Bassa daventa quai gia durant la notg sin la dumengia da Tschuncaisma sitg. Vers las Prealps ed en la Svizra Orientala resta quai per part bletsch fin la dumengia a bun’ura. Il cunfin da naiv sa sbassa però sin 1’000 fin 800 meters sur mar. Quai procura per ina tscherta schluccada, perquai ch’ina part da la precipitaziun resta a terra sco naiv e na curra betg giu.

RR novitads 11:00+

Artitgels legids il pli savens