L’idea per la festa da stad è naschida per casualitad. Il 2024 è numnadamain Robert Buchli da l’uniun Inscunters rumantschs Berna ì a giugar cun l’equipa rumantscha dal CBR a l’Europeada. Là nua che differentas minoritads da l’Europa dattan ballape ina cunter l’autra. A chaschun da l’EURO da las dunnas han ins lura decidì da far ensemen in’occurrenza cun focus sin las dunnas.
La festa cumenza la damaun cun in turnier da ballape da divertiment per uffants e creschids. Il suentermezdi datti lura in turnier da ballape tranter ils umens dal CBR ed ils umens dal FC Bethlehem da Berna, e silsuenter in turnier tranter las dunnas dal CBR e las dunnas dal FC Bethlehem.
Las dunnas dal CBR survegnan perfin sustegn d’ina autra minoritad, numnadamain da las dunnas da ballape ladinas. Normalmain giogan las dunnas rumantschas encunter las dunnas ladinas, questa giada uneschan ellas dentant las forzas per la festa da stad.
Ins sto savair che quellas duas equipas èn adversarias en ils gieus a las Europeadas, ma era mintga giada las meglras amias cura ch'i va per ir ensemen en sortida.
La dumengia va il CBR ensemen cun las dunnas ladinas a guardar il gieu da ballape da l'EURO da las dunnas cunter l'Islanda.
Ina festa per tuttas e tuts
Suenter ils gieus da ballape datti anc musica da Pascal Gamboni la saira ed era DJ Andri procura per atmosfera. La festa da stad duai avair in focus sin differentas generaziuns e, sche pussaivel, esser il cumenzament per dapli festas da stad en la diaspora. Robert Buchli explitgescha:
Nus avain er infurmà tut las autras cuminanzas ch'i dat en la diaspora da la festa, quai vul dir las cuminanzas da Lucerna, da Basilea, da Winterthur e da l'Appenzell. L’idea fiss che nus vegnin da sviluppar in'idea per ina festa da stad per ils Rumantschs e las Rumantschas che ha lieu mintg'onn insanua en in auter lieu cun in auter tema.
La gruppa Inscunters rumantschs Berna organisescha regularmain inscunters per Rumantschas e Rumantschs en la Bassa. Surtut era per pussibilitar als uffants d'avair dapli contact cun il rumantsch.
-
Bild 1 von 4. Per viver la cultura rumantscha er en la Bassa organisescha l'uniun Inscunters rumantschs Berna adina puspè occurenzas. Bildquelle: uniun Inscunters rumantschs Berna.
-
Bild 2 von 4. Oravant tut ils pli pitschens duain pudair discurrer e viver il rumantsch tar quels inscunters. Bildquelle: uniun Inscunters rumantschs Berna.
-
Bild 3 von 4. Uschia datti adina puspè eveniments nua che la diaspora a Berna sa po baratar. Bildquelle: uniun Inscunters rumantschs Berna.
-
Bild 4 von 4. Ed era giudair ensemen musica rumantscha. Bildquelle: uniun Inscunters rumantschs Berna.
Sch’ils inscunters han l'effect giavischà stuain nus dumandar noss uffants en 15 onns. Nus pudain uss far noss pussaivel per betg suenter stuair far quella renfatscha che nus n’avain betg empruvà da pussibilitar ad els l’ecosistem rumantsch, cunquai ch'igl è stà nossa decisiun da viver a Berna e betg si Tschamut. Uschia pens jau, ch'igl è nossa responsabladad d'empruvar da far il meglier pussaivel.
La festa da stad è in'ulteriura occasiun per viver la cultura rumantscha en la diaspora. Las organisaturas sa legran da pudair inscuntrar Rumantschas e Rumantschs ch'èn sparpagliads dapertut en Svizra.