Plirs commembers e commembras dal Cussegl federal han gia tegnì mesemna saira lur emprims pleds festivs a chaschun dal prim d’avust: La presidenta da la Confederaziun Viola Amherd ha suttastritgà a Möriken-Wildegg en il chantun Argovia ch’ins na discurria betg in sper l’auter vi en Svizra, malgrà il plurilinguissem.
A Lucerna ha Guy Parmelin appellà a la Svizra da betg sa far pli pitschna che quai ch’ella saja. Ed a Kesswil en il chantun Turgovia ha Albert Rösti ditg che l’urden statal da la Svizra saja il meglier dal mund.
La presidenta da la Confederaziun sa drizza oz anc a la populaziun cun in pled en la televisiun. Tut en tut tegnan ils commembers dal Cussegl federal 13 pleds festivs.
A la festa dal prim d'avust sin il Rütli en il chantun Uri sa participeschan 700 visitadras e visitaders. En il center da la festa federala saja da surmuntar il foss tranter las citads e la champagna. Envidà sin il Rütli eran la Federaziun svizra da las citads e la Gruppa svizra per las regiuns da muntogna.
Pleds festivs tut a dubel – ma co?
Pleds festivs d'emprim d'avust na datti betg mo dals cussegliers e las cusseglieras federalas – insumma tegnan blers politichers e politicras e persunalitads enconuschentas pleds durant questa festa naziunala. Il pled festiv tutga simplamain latiers – ma n'è quai betg adina il medem? E tge è il recept per tegnair in bun pled? Nus avain fatg la runda:
30 onns firà naziunal
Avant 30 onns è il di da la festa naziunala Svizra be stà in firà en insaquants chantuns. En auters chantuns han ins almain dastgà festivar saira sontga da mezdi u a las 16:00.
Markus Ruf vuleva unifitgar l'emprim d'avust sco firà naziunal senza lavur. L'emprim ha el dentant fatg naufragi. Ils adversaris ed ils adversaris argumentavan cun il federalissem. I saja l’incumbensa dals chantuns da fixar firads, la Confederaziun n'haja betg questa cumpetenza.
La fin settember 1993 han bunamain 84% da las votantas e dals votants mess in Gea en l'urna. Anc oz vegnia el pledentà pervia da quai, di Markus Ruf. Quai fetschia plaschair ad el. Il fatg che la gronda part da las Svizras e dals Svizzers han liber il 1. d'avust è anc adina da gronda impurtanza per l'advocat da 64 onns.
La carriera politica da Markus Ruf è ida a fin la fin dals onns 1990. Sia partida n'ha betg pli mess el sin sia glista electorala per il Cussegl naziunal. El saja daventà memia prus, hai gì num da quel temp.
Er en il Grischun vegn fatg festa
Davent da Alvra fin a Zuoz vegn oz festivà il prim d’avust. Qua chattais Vus ina pitschna – ma betg cumpletta –survista da tge che gira oz en las valladas da noss chantun.
Era radund 280 bain purils han quest onn puspè envidà al brunch dal prim d'avust – da quai radund 20 en il Grischun. Radund 100'000 persunas han prendì part en l'entira Svizra, tranter auter er intgins cussegliers federals. Mintga famiglia ospitanta retschaiva las visitadras ed ils visitaders en lur moda e maniera individuala, communitgescha l'uniun purila.
