Siglir tar il cuntegn

Header

audio
Films per la terra: Impressiuns dal festival
Or da Actualitad dals 22.11.2021.
laschar ir. Durada: 5 minutas 44 Secundas.
cuntegn

Festival «films per la terra» Far attent al clima cun in festival da film

Cun il festival da «films per la terra» vulan las organisaturas infurmar, inspirar ed activar il public da far dapli ponderaziuns davart l'ambient. I vegnian mussads films che raquintan las istorgias davos products dal mintgadi e dilucideschan dumondas ecologicas.

L'ultima fin d'emna ha gì lieu il festival da «films per la terra» en tut la Svizra. Era en Grischun èn vegnids mussads films a Cuira ed Arosa. Dapi 11 onns mussa l'uniun «Filme für die Erde Schweiz» films documentars per sclerir il public davart temas da l'ambient. L'uniun è perfin vegnida premiada il 2010 da l'UNESCO per lur lavur d'educaziun.

Far attent a temas da l'ambient

Cun films documentars vulan las organisaturas sclerir davart temas da l'ambient, che quai sajan temas sco agricultura, moda da fast fashion, u consequenzas directas da la midada dal clima e co i vegn tschertgà soluziuns.

Ils films na discurran dentant betg da temas fitg bels, quai che po era manar a frustraziun. Uschia era tar il film «Unser Boden, unser Erbe» ch'è vegnì mussà in venderdi saira. Il tema dal film ha dà da discussiunar en il publicum.

Atgnamain esi stà fitg frustrant da vesair quai, ma il film ha mussà a moda fitg realistica e fitg sincera l'agricultura d'ozendi.
Autur: Bernadette Arpagaus aspectatura da kino

Dentant han intgins era chattà motivaziun da far insatge per il clima suenter ch'els han vis il film. La stima da mangiativas è en mintga cas creschida suenter il film.

audio
Films per la terra: Frust u motivaziun per midar?
ord Actualitad dals 22.11.2021.
laschar ir. Durada: 3 minutas 14 Secundas.

L'effect da films documentars da l'ambient

Bernadette Roth, la co-directura da l'uniun «films per la terra» è persvasa, che mintga aspectatura e mintga aspectatur vegn influenzà dals films e sa fa suenter ils patratgs da ses agen consum e sia  influenza sin l'ambient.

Il bel vi da films documentars è, ch'els vegnan da simplifitgar temas cumplexs uschia ch'igl èn bain chapibels e pon en il medem mument era esser fitg commuventants.
Autur: Bernadette Roth co-directura da l'uniun «films per la terra»
audio
Films per la terra: Quant gronda è l'influenza da quests films?
ord Actualitad dals 22.11.2021.
laschar ir. Durada: 2 minutas 59 Secundas.

Gruppa en mira

Las organisaturas vulan cuntanscher uschè bleras persunas co pussaivel. Perquai è ina gruppa en mira era scolaras e scolars. Pliras classas èn vegnidas cun lur magistras e magisters a guardar films da l'ambient adattads a lur vegliadetgna. Tras quai speran las organisaturas da pudair fascinar ils uffants gia fitg baud da la natira e vul persvader els uschia da viver pli conscient a l'ambient ed al clima.

RTR actualitad 07:00

Artitgels legids il pli savens