Siglir tar il cuntegn

Header

Navigaziun

 Il retg dal 1999 en sias vignas sur Vevey.
Legenda: Raymond Favez: Il retg dal 1999 en sias vignas sur Vevey. RTR / Fabia Caduff
cuntegn

Fête des Vignerons «Er sch’i dat uss in nov retg, la curuna poss jau salvar»

Bler n’ha Raymond Favez betg purtà la curuna da retg. Atgnamain be quella giada cura ch’el è vegnì incurunà sco prim retg a l’ultima Fête des Vignerons il 1999. Midà bler per el e sia lavur n’ha il titel da retg en mintga cas betg – mo ch’el è vegnì in zic pli enconuschent.

Sche Raymond Favez è en gir cun amis, lura auda el anc ussa da temp en temp: «Guardai mo, nus avain il retg tranter nus», u er che la glieud sin via salidan el cun «bonjour al retg».

Uschiglio n’è betg bler sa midà dapi ch’el è vegnì retg avant 20 onns a la Fête des Vignerons. Profità economicamain dal titel n’haja el en mintga cas betg, cunquai ch’el haja er vinavant furnì ses vin ad in cumprader a l’engrossa, manegia l’um ch’ha gia daditg surpassà la vegliadetgna da pensiun.

Daventa il prinzi retg

Bain fa Ramond Favez anc adina ses agens vins, il bain da viticultura ha el però en il fratemp surdà a ses figl che cuntinuescha uschia la professiun da viticultur en terza generaziun. «Quai fa a mai grond plaschair ch’el ha surpiglià la gronda part», di Raymond. Dentant per evitar pli gronds conflicts han els da l’entschatta davent partì si tut uschia che mintg’in po far il ses. «Pertge ins vesa adina puspè ch’i dat dispitas, cura che la generaziun giuvna surpiglia.»

Sch’i dat suenter il 1999 puspè in retg en famiglia sa mussa questa saira tar il grond spectacul en l’arena a Vevey. Tant el sco ses figl fan part a la concurrenza per daventar in dals tschintg retgs da la Fête des Vignerons.

RR actualitad 07:00