Cun ina pagina dad internet falsifitgada han hackers dal Club da computers Chaos pudì manipular il sistem dad e-voting dal chantun Genevra. Quest sistem vegn er duvrà dal chantun Basilea-Citad per Svizzers e Svizras en l'exteriur e persunas cun in impediment. Pass per pass duai quest sistem er vegnir introducì en Grischun.
Sco la presidenta da la conferenza dals chanceliers chantunals, Barbara Schüpbach-Guggenbühl, ha ditg la sonda envers Radio SRF, funcziunia il sistem sco tal senza incaps er suenter che hackers hajan chattà ina largia da segirezza. Il problem saja da la vart dals utilisaders. E perquai na dettia naginas raschuns per midaments.
Utilisader sto seguir penibel exact las instrucziuns
Schüpbach-Guggenbühl ha dentant concedì, ch'i saja pretensius per ils utilisaders dad emplenir ora correct il formular e quels stoppian esser fitg premurus. Ils mussavias ch'ils responsabels mettan a disposiziun descrivian minuziusamain mintga pass. Cun far per exempel in uschè numnà fingerprint sin l'attest da votar, possia l'utilisader verifitgar ch'el sa chattia sin la dretga pagina.
Per las proximas votaziuns na saja pia betg previs da far midaments vi dal sistem dad e-voting. Ils utilisaders sajan uss, suenter ils rapports en las medias, probablamain anc pli attents cun emplenir or correct il formular electronic, ha Schüpbach-Guggenbühl ditg vinavant a Radio SRF.
RR novitads 12:00
