La Tagesschau da la televisiun da la Svizra tudestga SRF ha rapportà incorrect en ina contribuziun davart l'affera da la Fifa, la Federaziun internaziunala da ballape. A questa conclusiun è vegnida la UBI, l'Autoritad independenta da recurs davart radio e televisiun.
La fin da l'october passà è la procedura penala encunter l'anteriur procuratur public federal Michael Lauber ed il president da la Fifa Gianni Infantino vegnida sistida. Quella saira ha la Tagesschau rapportà da quai cun laschar vegnir a pled diversas persunas.
L'emissiun haja dentant manchentà da tadlar ils responsabels per la decisiun da sistir la procedura, ils procuraturs publics generals. Quai ha decidì l'Autoritad independenta da recurs cun in votum stretg da quatter encunter trais vuschs.
