Siglir tar il cuntegn
Inhalt

Svizra Fin 8 milliardas francs per cumprar aviuns

Il Cussegl federal vul investir fin 8 milliardas per novs aviuns e per rachetas. Quai ha il Cussegl federal decidì mesemna. La sanestra è cunter quests plans, la dretga beneventa els. En il plan d'armaziun per 10 onns èn previsas investiziuns da 15 fin 16 milliardas francs.

F/A-18
Legenda: Ils aviuns F/A-18 Hornet da l'aviatica militara svizra duain bain vegnir remplazzads. Per evitar ina largia, sgolan els però pli ditg. Keystone

Quants aviuns, quantas rachetas, e sch'il pievel po decider davart quest'investiziun n'è anc betg cler. In rapport d'experts per mauns dal Cussegl federal aveva proponì da cumprar 40 aviuns da cumbat ed in sistem da defensiun en l'aria per radund 9 milliardas francs.

Survegliar l'aria svizra durant 24 uras

Cun ina tala schliaziun avess la Svizra la pussaivladad da survegliar l'aria svizra durant 24 uras. Durant plirs mais pudessan dus aviuns patrugliar ed observar l'aria. Il sistem da defensiun permettess da cuvrir radund in terz da la surfatscha svizra. Per pudair cumprar novs aviuns ed ulteriuras investiziuns vul il Cussegl federal auzar il budget per il militar per 1,4% ad onn.

F/A-18 patruglieschan pli ditg

Tenor l'urari duai vegnir decidì, tgenin tip d'aviun cumprar en il decurs dal 2020, uschia che la flotta fiss en servetsch a partir dal 2030. E per evitar ina largia en la defensiun aviatica, fiss la flotta actuala da F/A-18 anc en servetsch pli ditg. Per la sanaziun da las F/A-18 Hornets per quest intent quinta il Cussegl federal da stuair impunder ina mesa milliarda francs.

Sanestra è cunter - la dretga beneventa

Uschia beneventa PPS la decisiun dal Cussegl federal. I saja in pass en la dretga direcziun. Sche las otg milliardas per ils novs aviuns da militar sajan però avunda, dubita la partida. Da quest avis è er la societad d'uffiziers da l'aviatica militara.

La PLD è cuntenta cun la schliaziun. I sa tractia d'ina via per mez ora.
La PCD ha be communitgà ch’ella haja prendì enconuschientscha da la decisiun.

Cunter ils plans dal Cussegl federal è la PS. I na dettia nagina raschun per ina tala «varianta da luxus» per armas. Er ils Verds refuseschan la decisiun. Els pretendan dal Cussegl federal da lubir ina debatta democratica davart in project concret.

La Gruppa per ina Svizra senz’armada (GSOA) pretenda in referendum davart la cumpra da novs aviuns da cumbat. Il preventiv saja bler memia aut ed in affrunt envers il pievel, argumentescha la GSOA.

RR novitads 18:00 +