En Svizra vegnian stritgadas fin a 440 plazzas, communitgescha Novartis. En tut lavuran en Svizra 10’400 persunas per il concern, da quai 3’000 en il svilup.
Vitiers pudessan esser pertutgadas fin a 240 ulteriuras plazzas en ils Stadis Unids. Là dumbra la partiziun dal svilup actualmain enturn 2’000 plazzas. En tut saja da spetgar cun ina reducziun da plazzas dad 1 fin 2 pertschient en l’organisaziun dal svilup sin l’entir mund.
Il medem mument vul Novartis stgaffir novas plazzas tar il svilup, a Basilea ed en auters lieus. Quai stat en connex cun cumprar firmas, cun schlargiar capacitads, e cun bajegiar si novas cumpetenzas.
La transfurmaziun mida pretensiuns
Questa restructuraziun saja daventada necessaria en vista a las midadas en il concern ils davos onns, menziunescha Novartis en sia communicaziun. Cun sa separar da la sparta da generica Sandoz l’october passà saja fatg il davos pass – per daventar in concern da farmazia focusà. Questa nova strategia da Novartis definescha tschintg secturs da coc terapeutics.
Entant ha il concern cumenzà cun las consultaziuns, en il rom dal plan social.
