Siglir tar il cuntegn

Header

Purtret da Michael Lauber
Legenda: Michael Lauber sorta per la fin da quest mais da l'uffizi sco procuratur public general. Keystone
cuntegn

Fin d'in chapitel Michael Lauber sorta ils 31 d'avust da ses uffizi

La cumissiun da la dretgira da l'assamblea naziunala ha approvà oz, mesemna ch'il procuratur public general Michael Lauber sorta ils 31 d'avust da ses uffizi. Las vacanzas ch'el avess anc da bun vegnan pajadas ora. Cun questa decisiun vegn la procedura da relaschada d'uffizi da Lauber obsoleta.

La cumissiun ha prendì per enconuschientscha che Michael Lauber ha dà giu sia plazza sin ils 31 da schaner 2021. El ha fatg amogna da scursanir il termin fa disditga per tschintg mais, uschia ch'el va definitivamain gia ils 31 d'avust 2020. La cumissiun aveva cumenzà il matg 2020 ina procedura da relaschada d'uffizi encunter Lauber. Cun la desditga da Lauber, vegnia quella dentant obsoleta. Perquai vegn la procedura sistida formalmain, quai vala a partir dal prim da settember 2020.

L'autoritad da surveglianza da la Procura publica federala, è responsabla d'organisar che las fatschentas vegnan surpigliadas a partir dal prim da settember dals dus substituts dal procuratur public general.

Fin a la sessiun d'enviern vul la cumissiun proponer in successur u ina successura per il post dal procuratur public general. Quella persuna surpiglia il post per il rest da la perioda d'uffizi.

RTR novitads 14:00

Artitgels legids il pli savens

Scrollar a sanestra Scrollar a dretga