Ils jets da cumbat dal tip F-5 Tiger duain restar per terra a partir da la fin dal 2027. Quai vul il Departament federal da defensiun VBS. Uschia mancassan a la Patrouille Suisse ses aviuns. Quai ha ditg il cumandant da l’aviatica militara Peter Merz envers Radio SRF. La raschun da la zavrada planisada èn ils custs da radund 40 milliuns francs mintg'onn e la situaziun finanziala da l'armada ch'è tendida. Ins n'investeschia perquai betg pli en sistems vegls, ha Merz ditg vinavant. I duvrassia ils proxims onns bleras investiziuns sco per exempel en ils instruments dals jets u per novas patronas per ils sezs catapultabels.
Il 2027 èsi plinavant previs da cumenzar a sgular cun ils novs jets da cumbat F-35. Uschia pon ils jets F/A-18 surpigliar la rolla da partenaris da sparring en l'aria – la rolla ch'ils jets Tiger fan ozendi per las F/A-18.
E tge capita cun las shows da la Patrouille Suisse?
Co ina show da la squadriglia da sgol acrobatic pudess vesair or en l’avegnir na saja anc betg cler. Ina pussaivladad fiss tenor il cumandant da l'aviatica militara ch'il team cun las maschinas da propeller Pilatus PC-7 surpigliass quella rolla. Quai stoppia però anc vegnir discutà politicamain. Cler saja però che l'aviatica militara veglia er en l'avegnir porscher preschentaziuns en l'aria suenter il 2027.
L’ultim pled en chaussa ha il parlament. Lez sto da princip adina decider sch'in sistem d'armas pli grond vegn piglià ord funcziun. Quai è er il cas tar ils jets F-5 Tiger.
