Quai scriva il Cussegl federal en sia resposta ad ina interpellaziun dal cusseglier dals chantuns lucernais Damian Müller (PLD). Quel vuleva savair suenter divers rapports da medias, tge che la Confederaziun fetschia cunter requirents d’asil criminals.
Fin uss è in center d’asil federal spezial en funcziun, a Les Verrières en il chantun Neuchâtel. Il nov center duai sa chattar en la Svizra tudestga – il lieu exact è dentant anc betg cler.
10 plazs a Les Verrières
L’onn passà è il center stà occupà en tut da 108 persunas. En media eran set persunas plazzads a Les Verrières, tar ina capacitad da 10 plazs. Las bleras persunas eran oriundas dal Nordvest da l’Africa, sco l’Algeria, la Tunesia ed il Maroc.
Il center spezial a Les Verrières sto ademplir basegns da segirezza pli auts. Perquai èn ils custs da manaschi annuals per letg set giadas pli auts ch’en in center d’asil federal regular, tenor las infurmaziuns dal Cussegl federal. Persuenter s’augmentia cun questa separaziun la segirezza e la convivenza en ils auters centers federals.