Els hajan fixà il rom, co la vaccinaziun prematura dal persunal da sanadad possia succeder, ha ditg a Berna Christoph Berger, il president da la cumissiun per dumondas dal vaccinar. Sin basa da questas cundiziuns da rom possian ils chantuns decider, tut tenor situaziun e basegn – quant bler persunal da sanadad che po vegnir vaccinà e cun tge prioritad.
Actualmain na recumondian els betg da vaccinar dunnas en speranza, ha Christoph Berger manegià. Per ils dus vaccins lubids en Svizra manchian anc avunda datas da studis, per pudair excluder tut ils ristgs da sanadad. Sche dapli datas sajan avant maun, pudessian els adattar questa recumandaziun, ha Berger ditg.
In'entschatta empermettenta
200'000 vaccinaziuns hajan ils chantuns fatg fin uss, ha punctuà la vicedirectura da l'Uffizi federal da sanadad BAG Nora Kronig. En ils emprims trais mais da quest onn spetgian els cun stretgas tar la furniziun da vaccins. Il segund quartal duai lura esser pussaivel da vaccinar ina pli gronda part da la populaziun. En general haja la campagna da vaccinar dentant cumenzà empermettent.
Levet optimistic areguard la situaziun
Bain sa movian las cifras dals cas e dals mortoris en la dretga direcziun, disciplina saja dentant vinavant impurtanta, ha ditg Patrick Mathys da l'Uffizi federal da sanadad. La reducziun na saja anc betg uschè ferma, sco els spetgian quai.
Fastidis fan a las autoritads las mutaziuns dal virus. Fin uss han ins chattà tar 1'126 provas ina da las variantas. Radund la mesadad tutga tar la varianta britannica. Tenor il schef da la taskforce scientifica, Martin Ackermann – vegn questa varianta probablamain a far ora il mars la mesadad da las infecziuns.
Puspè damain infecziuns
Il BAG ha annunzià il mardi da mezdi 1'884 infecziuns novas da corona. La media dals davos set dis è uschia tar 1'927. Quai èn 11 pertschient damain che l'emna avant. Il trend mussa uschia engiu. Vitiers ha l'Uffizi federal da sanadad inditgà 57 ulteriurs mortoris en connex cun covid-19.
En il Grischun hai dà 42 infecziuns novas da corona, dentant nagins mortoris. Actualmain sa chattan 30 persunas en ospitals grischuns – trais dapli ch'il di avant.
