Siglir tar il cuntegn

Header

cuntegn

Svizra Finanzas restan in plazzal – Orascom en cifras cotschnas

L’interpresa Orascom da l'investider egipzian Samih Sawiris haja bain nudà ils emprims nov mais da l'onn 33% dapli svieuta, restia dentant tuttina en las cifras cotschnas. Quai scriva l’agentura da novitads SDA.

Dal schaner al settember 2018 haja l’investider Samih Sawiris fatg cun ses concern multinaziunal Orascom Development Holding cun 228 milliuns francs per 33% dapli svieuta che l’onn avant. Pervi da la svalitaziun dal pfund egizpian restia l’interpresa tuttina en las cifras cotschnas, scriva la SDA.

Svilup positiv en Egipta

La branscha da turissem en l’Egipta saja sa sviluppada positiv, argumentescha l’interpresa il resultat. Uschia hajan els pudì occupar ils hotels ad El Gouna per 79%, quai èn 4% dapli giasts ch’anc en la perioda cumparegliabla l’onn avant. Ma en general saja la svieuta en la sparta hotel creschida per 21% sin radund 110 milliuns francs.

Naginas previsiuns pertutgant finanzas – ma grond project avant finiziun

La societad Orascom Holding ch’è quotada a la bursa svizra, na fa betg previsiuns davart il gir d’affars. Ella fa dentant a savair ch’ella cuntinueschia ils discurs cun las bancas per pudair reducir ils debits.

L’Orascom Holding è participada cun 49% a la destinaziun Andermatt Swiss Alps. Ella paja tras l’arena da skis la part principala – 82 milliuns francs – dals radund 130 milliuns per realisar il mega-project da la colliaziun dals territoris da skis dad Andermatt e Sedrun. La colliaziun duai vegnir realisada per quest enviern.

RR novitads 09:00+

Artitgels legids il pli savens