Siglir tar il cuntegn
Inhalt

Svizra Finma: Raiffeisen ha controllà memia pauc

La Finma constatescha mancanzas gravantas tar la gestiun da la Raiffeisen. En in rapport constatescha la Finma che la Raiffeisen haja lavurà manglus cun tractar conflicts d'interess ed haja negligì da controllar l'anteriur schef Pierin Vincenz ed ella ha decidì mesiras.

logo raiffeisen
Legenda: Tenor la Finma han ils gremis che gestiuneschan la Raiffeisen lavurà manglus. Keystone

En il rom d'ina uschènumnada procedura dad «enforcement» constatescha la Finma en ses rapport, il link avra en ina nova fanestra che la Raiffeisen haja

  • lavurà manglus tar tractar cunflicts d'interess e
  • il cussegl d'administraziun haja negligì la controlla.

Instradà la procedura ha la Finma il 2016 pervi da suspect da cunflicts d'interess, suenter che la Raiffeisen aveva cumprà participaziuns pli grondas da pliras firmas. Uschia sajan pliras rollas ed uffizis cumulads sin singulas persunas e chaschunà cunflicts d'interess. Tenor la Finma sajan ils ristgs era vegnids negligids tar surdar credits a persunas participadas en questas transacziuns.

Procedura «Enforcement»

Personen-Box aufklappenPersonen-Box zuklappen

Sche scleriments informals dattan avunda indizis, decida la Finma da far talas proceduras dad «enforcement»., il link avra en ina nova fanestra Mintg'onn fa la Finma bleras talas proceduras cunter firmas, lur possessurs e collavuraturs che fan part al martgà da finanzas. Quests vegnan infurmads da las inquisiziuns e pon pigliar posiziun vers eventualas renfatschas. La Finma po ordinar mesiras cunter firmas e persunas ch'èn sa cumportadas illegalmain. Mesiras pussaivlas van dad ordinar da sistir ina pratica fin tar la liquidaziun.

Cussegl d'administraziun haja controllà manglus

Il cussegl d'administraziun haja lavurà manglus sco organ ch'avess da controllar, survegliar e manar pliers secturs da la banca e la direcziun – quai surtut il temp dal 2012 al 2015. Tras quai haja il cussegl creà la situaziun ch'ins pudessia potenzialmain malduvrar la posiziun.

Sut la marella: Il CEO Pierin Vincenz

Il cas concret che la Finma ha intercurrì è stà la participaziun da la Raiffeisen vid las firmas Investnet, KMU Capital ed Investnet Holding – cun focus spezial sin la rolla dal CEO da lezzas uras Pierin Vincenz. Lez era persunalmain era acziunari minoritar da la Investnet Holding.

Las mesiras ordinadas

La Finma ha decretà da curriger la situaziun. Il cussegl d'administraziun da la Raiffeisen Svizra sto vegnir renovà ed amplifitgà cun cumpetenzas dal fatg. Almain 2 commembers stuessian avair experientschas en il sectur da bancas. Ultra da quai sto la Raiffeisen examinar sin incumbensa da la Finma, ils avantatgs e dischavantatgs da transformar la banca en ina societad anonima.

Procedura cunter Vincenz sistida il 2017

La procedura che la Finma aveva instradà encunter la persuna da Pierin Vincenz, aveva la Finma sistì il december 2017. Quai suenter che Vincenz era sa retratg da plirs mandats ed aveva declerà da betg pli lavurar en la branscha da finanzas, declera la Finma. Cuort suenter era la procura publica da Turitg vegnida activa, sin basa dad annunzias da la societad da carta da credit Aduno e da la Raiffeisen sezza. Quai aveva manà ad interrogaziuns ed arrest d'inquisiziun per Pierin Vincenz. Mesemna è Vincenz vegnì liber suenter radund 100 dis d'arrest d'inquisiziun.

Raiffeisen Svizra accepta disposiziun

Entant ha la banca Raiffeisen Svizra reagì ed accepta la disposiziun da la Finma. Pliras mesiras da correctura sajan instradadas e per part gia en vigur dapi 2 onns, communitgescha la Raiffeisen., il link avra en ina nova fanestra Ils ultims mais ha Raiffeisen instradà examinaziuns independentas internas davart tut las participaziuns da la banca ad autras firmas – participaziuns cumpradas durant il temp cun Vincenz sco directur.

RR novitads 08:00