Suenter la banca tessinaisa BSI vegn era la banca turitgaisa Falcon Private Bank sut squitsch pervi da l'affera enturn lavar daners en connex cun il fond statal da la Malaisia 1MDB. La Falcon Private Bank vegn sancziunada da la FINMA. Ella tira en il gudogn betg giustifitgà da 2,5 milliuns francs e smanatscha da retrair la licenza bancara.
Cumportament sbaglià
Tenor la FINMA ha la banca cuntrafatg a moda greva a la lescha davart la lavada da daners suspectus. Plinavant n’haja la banca privata betg sclerì transacziuns cumplexas en detagl. Dus commembers dal cussegl d’administraziun hajan persequità atgnas finamiras illegitimas. Quai scriva la FINMA en ina communicaziun.
Ultra da quai privescha l'autoritad statala da daners da Singapur (MAS) a la banca privata il status d'ina banca da commerzi en il pajais asiatic. La raschun per las sancziuns èn relaziuns da fatschenta e transacziuns, uschia scriva la surveglianza dal martgà da finanzas svizzer.
UBS sto pajar chasti
Er la banca gronda UBS è involvida en quest scandal. Perquai ha la surveglianza da finanzas da Singapur sentenzià ella ad ina multa da radund 930'000 francs. L'UBS haja cuntrafatg a la lescha davart la lavada da daners suspectus. Quai communitgescha la surveglianza da finanzas da Singapur.
UBS deplorescha
La banca UBS sa mussà plain ricla. Els sajan trumpads ch'els n'hajan betg fatg dapli per scuvrir e rapportar pli baud da quest cas, uschia fa a savair la banca gronda svizra. - Gia la stad è vegnì enconuschent che l'UBS è involvida en il scandal.
RR novitads 08:00