Ina gruppa che sa numna Alphv ha engulà datas dal producent da maschinas da cuser Bernina. Tranter auter pretenda ella d'avair engulà documents da fatschenta, copias da chartas d'identitad da lavureras e lavurers ed offertas. En tut sajan quai stads 200 gigabytes.
Bernina n'ha betg pajà
La firma n'ha betg pajà daners per survegnir enavos las datas, tenor atgnas indicaziuns. Uschia èn las datas vegnidas publitgadas en l'internet la notg sin mesemna. Bernina di dentant ch'ils hackers hajan engulà pli pauc datas che quels pretendan.
L'onn passà haja la gruppa Alphv er attatgà autras interpresas svizras sco il servetsch da finanzas Finaport e l'interpresa Swissport. La gruppa dovra uschenumnada Ransomware per entrar en sistems serrads dad interpresas e per lura extorcar daners.