Il fond naziunal ha investì l’onn passà 882 milliuns francs en la perscrutaziun. Quai èn 55 milliuns francs pli pauc ch’anc il 2020. Quai ha communitgà il Fond naziunal svizzer.
Damain daners federals
Per avair investì pli pauc dettia pliras raschuns. Ina raschun saja, ch'i haja dà damain daners da la Confederaziun. Totalmain ha il fond promovì 1’800 projects scientifics. Uschia er in project da l’ETH Losanna ch'intercurescha cun tge spertadad che l’univers s’extenda. Ubain in project da l’Universitad da Berna ch'examinescha las consequenzas da la pandemia da corona sin las tenutas politicas. Ils blers daners han projects da la matematica e da las scienzas natiralas survegnì – en tut 339 milliuns francs.
Pli gronda collavoraziun internaziunala
Il fond naziunal haja la fin da l'onn 2021 e l'enschatta 2022 extendì la collavuraziun internaziunala. Da nov datti ina collavuraziun ensemen cun organisaziuns per promovaziun dals Stadis Unids e da la Gronda Britannia. Plinavant ha il fond lantschà ensemen cun la Direcziun da svilup e da cooperaziun in program che promova perscrutaziun interdisciplinara cun pajais en svilup.
La cumpart da dunnas vi dals projects saja tar 39%. Dentant saja la cumpart da dunnas ch'han manà tals projects stada pli bassa, numnadamain 30,7%. Cumpareglià cun il 2020 è quai dentant in augment da 1,6%.