Il Cussegl dals chantuns na vul betg crear in fond spezial da 15 milliardas francs per finanziar l’armada e sustegnair la reconstrucziun en l’Ucraina. Ina clera maioritad da la chombra pitschna ha ditg Na ad ina proposta da la cumissiun da segirezza.
Il deal per guntgir il frain da debits
L'idea era da guntgir uschia il frain da debits e da pussibilitar a l'armada da far pli svelt las investiziuns necessarias. Previs eran 10 milliardas francs supplementars per ils onns 2025 fin 2030. Parallel avessan tschintg milliardas francs duì ir en favur da l'Ucraina. Là en emprima lingia per la reconstrucziun d'infrastructura elementara sco per exempel il provediment electric u ils stgaudaments a distanza.
L'armada na saja betg preparada per defender la Svizra – din ils aderents
L'armada saja preparada per bler, betg però per defender l'agen pajais, uschia ils aderents dal fond spezial. Ultra da quai saja en l'interess da la Svizra e da tut l'Europa da sustegnair l'Ucraina.
Ina fatschenta da chavals – argumenteschan ils adversaris
Ils adversaris dal fond han argumentà cun la politica da finanzas. Da colliar las finanzas da l'armada cun il sustegn per l'Ucraina saja ina fatschenta da chavals che mettia en privel a lunga vista la stabilitad finanziala da la Confederaziun. Tuttas duas finamiras possian ins cuntanscher cun auters meds, senza indeblir il frain da debits.
La Tagesschau da SRF aveva declerà suandantamain la fatschenta dispitaivla:
