En Svizra sa tschentan mintg'onn 2,8 milliuns tonnas mangiativas ch'ins po anc mangiar en il rument, constatescha la fundaziun Praktischer Umweltschutz Pusch en ina communicaziun. Tenor calculaziuns da l'Uffizi federal da l'ambient van a perder uschia en Svizra mangiativas giudiblas da 90 kilos per persuna ed onn en in tegnairchasa.
L'uschenumnà «Food Waste» engrevgiescha betg mo la bursa mabain fa er donn a l'ambient. Communablamain cun radund 70 partenaris (tranter auter l'Uniun purila svizra u l'Uffizi federal da l'ambient) ha in'allianza lantschà ina campagna naziunala, «Save Food, Fight Waste», cunter il sfarlattim da mangiativas.
Eticamain immoral
En la gastronomia ed en tegnairchasas privats saja spezialmain impurtant da guntgir il sfarlattim da mangiativas, il Food Waste. Quest sfarlattim augmentia las sfidas ecologicas, economicas e sozialas globalas e quai saja eticamain immoral, hai num en ina communicaziun. La finamira saja da reducir a moda drastica la quantitad da mangiativas che vegn bittada davent en Svizra. Uschenumnads «Food Ninjas» duain mussar a consumentas ed a consuments co els pon guntgir effectivamain vanzadiras.
RTR novitads 17:00