Siglir tar il cuntegn

Header

cuntegn

Svizra Forsa bainbaud ina e-vignetta per l'autostrada

Ils dis da la vignetta d'autostrada sco tatgader paran da ir a fin. Il cussegl federal propona per il futur ina vignetta electronica ed ha tramess la fatschenta en consultaziun.

Era la e-vignetta duai custar 40 francs sco fin ussa. Per possessurs da motos e per char annexs duai custar mo pli la mesadad. Questa purschida na saja betg pussibla cun ina vignetta da tatgar, argumentescha il Cussegl federal. Plinavant saja la vendita chara e pretensiusa. Ils posts da vendita survegnian mintg'onn radund 35 milliuns francs. Era in problem è che possessurs da plirs autos che han in numer d'auto da stgamiar, ston avair per mintga auto ina vignetta.

Registraziun electronica dal numer

Da nov stuessan ils automobilists sa registrar cun il numer da l'auto. Las controllas na vegnissan betg pli fatgas da la polizia, mabain da cameras da video. La vignetta pudess vegnir cumprada sur l'internet u sur in'applicaziun ed il numer da l'auto vegniss registrà sin ina banca da datas.

La controlla fiss era electronica, per exempel cun ina controlla da video per cumparegliar ils numers. Era pussibel fiss ina communicaziun directa tranter l'auto ed il sistem. Sche l'auto n'è betg registrà survegniss il possessur tramess directamain in chasti.

Ils custs per mantegnair quai sistem fiss cun 35 milliuns ad onn per 13 milliuns pli bunmartgà ch'oz. Perquai ch'i fiss era pli grev da cugliunar, quinta il Cussegl federal cun 26 milliuns dapli entradas per onn.

Vinavant vul il Cussegl federal desister d'ina vignetta be per curt temp, sco quai che auters pajais porschan. Per tegnair constant ils custs stuess ins lura numnadamain auzar il pretsch da las vignettas regularas.

RR novitads 14:00

Artitgels legids il pli savens