La votaziun finala davart l'iniziativa parlamentara da Albert Rösti PPS/BE a favur d'examinaziuns ecologicas pli simplas per ils gestiunaders d'ovras idraulicas è stada pli tensiva che spetgà en il Cussegl naziunal.
En in'emprima votaziun ha la chombra gronda refusà cun 98 cunter 91 vuschs ch'ils gestiunaders d'ovras idraulicas ston prender damain mesiras d'ambient sch'i va per concessiuns novas. Intgins muments pli tard ha il cusseglier naziunal Marcel Dettling PPS/SZ pretendì ina segunda votaziun.
Pliras persunas sajan s'annunziadas tar el e ditg ch'ellas hajan votà fauss. Cun 100 cunter 95 vuschs ha il Cussegl naziunal lura decidì da repeter la votaziun.
Pli auta Svizra dat la decisiun da tagl
Lura è la tensiun creschida. En la segunda votaziun hai dà in pari da 95 cunter 95 vuschs tar set abstenziuns. La presidenta liberaldemocratica dal Cussegl naziunal, Isabelle Moret, ha lura dà la decisiun da tagl a favur da la lescha davart il dretg da las auas revedida.
Il Cussegl dals chantuns ha approvà las reglas d'ambient schluccadas cun 27 cunter 16 vuschs.
RTR novitads 11:00