Siglir tar il cuntegn

Header

cuntegn

Svizra Forza idraulica: Proposta da cumpromiss dat da discutar

Enfin il 2020 ston ils tschains d'aua ch'ils concerns d'electricitad han da pajar als chantuns ed a las vischnancas per dastgar duvrar las auas per la producziun vegnir calculads da nov. Ina nova proposta da l’Uffizi federal d'energia co schliar il conflict provochescha reacziuns fitg differentas.

Ils tschains d'aua duain vegnir calculads da nov il futur. Ina part duaja esser fixa e tschella part duaja esser dependenta dal success dals concerns d'electricitad. Quai propona Walter Steinmann, il directur da l’Uffizi federal d'energia. Actualmain n’èn ils tschains d'aua betg dependents dal gudogn dals concerns d'electricitad. Cun la regulaziun nova survegnissan las vischnancas ed ils chantuns muntagnards pli paucs daners che oz.

Reacziun Silvia Semadeni

Per la cussegliera naziunala Silva Semadeni da la PS fiss ina regulaziun cun ina cumpart fixa ed ina cumpart variabla ina pussaivladad per il futur. «Per nus fissi meglier sch’i na duvrass in cumpromiss. Mo cun il squitsch che nus avain oz il di sin ils tschains d’aua vegn quai schon ad esser la via che nus stuain ir.» Decisiv saja dentant con auta che la cumpart fixa saja. Almain 70% dals tschains actuals stuessi quella schon esser.

audio
Saira: Cumpromiss per tschains d'aua dat da discutar
ord Actualitad dals 02.06.2016.
laschar ir. Durada: 2 minutas 1 Secunda.

Reacziun Magdalena Martullo

Tut auter vesa quai sia collega Magdalena Martullo da la PPS. Ina midada dal sistem na vegnia gnanc en dumonda. Ils chantuns muntagnards stoppian restar dirs. I na saja betg lur chaussa da proponer in cumpromiss. Da far dependent ina part dals tschains d'aua dal success dals concerns d'electricitad saja plinavant mo da dischavantatg per las regiuns muntagnardas. «Quels concerns han differentas pussaivladads da betg nudar in gudogn la fin da l’onn. Gist ussa che bleras dad ellas diversifitgeschan lur fatschenta en novs secturs e na fetschian betg pli la fatschenta tradiziunala cun l’electricitad. Ellas vegnan lura simplamain a mussar ina schletta bilantscha per ch’ellas survegnian uschè bleras subvenziuns sco pussaivel e ch’els stoppian il medem mument pajar uschè paucs tschains d’aua sco pussaivel.»

Decis n'è anc nagut

Anc sa tracti mo dad ina proposta. Dentant, davos las culissas vegnan las contractivas manadas cun bandaschas diras. Perquai leva era nagin parlamentari cun contacts tar ils concerns d'electricitad prender posiziun en causa. Mo tant: Mintga cumpromiss che maini a tschains d'aua pli bass vegni beneventà.

RR actualidad 17:00

Artitgels legids il pli savens