Siglir tar il cuntegn

Svizra Franzos en scola primara

L'instrucziun en il segund linguatg ester duai cumenzar gia en la scola primara. Quai vul il Cussegl federal francar en la lescha da lingua, sch'ils chantuns na realiseschan betg lur strategia da lingua. Il Cussegl federal ha avert la consultaziun per cumplettar la lescha da lingua.

In uffant viid schliar pensums da franzos.
Legenda: Il segund linguatg ester duai esser obligatoric en la scola primara. Keystone

El metta en discussiun trais variantas:

Varianta 1

Lezza suonda a la proposta da la cumissiun da furmaziun dal Cussegl naziunal che prevesa che l'instrucziun en la segunda lingua estra cumenza en la tschintgavla classa primara.

Varianta 2

Lezza franchescha la schliaziun dal concordat da Harmos sin basa da la lescha. Ella fixescha che l'emprima lingua estra è d'instruir en la terza classa primara e la segunda lingua estra en la tschintgavla classa. Ina da las linguas è ina lingua naziunala, l'autra è englais.

Varianta 3

Lezza franchescha che l'instrucziun en la segunda lingua estra sto cumenzar en la scola primara e sto durar enfin la fin da la scola secundara 1 (9avel onn da scola).

Il Cussegl federal priviligescha la varianta 3. Ils chantuns eran sa cunvegnids sin varianta 2, intgins chantuns vulan dentant desister sin il franzos tempriv, uschia per exempel Turgovia, Turitg, Lucerna e Glaruna nua ch'i dat iniziativas u consultaziuns.

Lia Rumantscha è satisfatg

La Lia Rumantscha beneventa la decisiun dal Cussegl federal da vulair integrar en la lescha da linguas l’instrucziun dad in segund linguatg naziunal gia en scola primara. I saja bun ed impurtant, che la posiziun da las linguas naziunalas en scola duain vegnir rinforzadas , ha ditg il pledader Andreas Gabriel sin dumonda dad RTR. Quai era sche il Rumantsch na saja betg pertutgà enormamain da questa decisiun.

RR novitads 15:00