Ils regals en las butias duain restar plains. La segirezza alimentara vul che la populaziun svizra haja adina la pussaivladad da cumprar en avunda e quai en buna qualitad. Per il cussegl federal saja la segirtad alimentara in impurtant punct.
Nus na dastgain betg adina ir ora da quai che las cundiziuns èn adina uschè favuraivlas sco ils ultims onns e sco ussa. Nus duain esser preparads era per cundiziuns main bunas uschia che la populaziun po adina vegnir nutrida.
Uriundamain ha l’Uniun purila svizra inoltrà l'inizitiva «per la segirtad alimentara». Però per il parlament sco era per il Cussegl federal era l’iniziativa focussada memia sin la producziun indigena ed era betg formulada precisa. Sin quai ha il parlament fatg ina cuntraproposta. Il parlament aveva approvà questa cuntraproposta il mars. Ils purs han sin quai retratg lur iniziativa en favur da la cuntraproposta.
En sasez è la segirtad alimentara gia en la constituziun. Però cun la cuntraproposta datti dapli segirtad per ils purs, di il Cusseglier federal Johann Schneider-Ammann. Cun metter l’artitgel en la constituziun duain en emprima lingia vegnir segirà il terrain e l’aua. Las resursas duain era vegnir duvradas effizientamain. Era duain vegnir tgiradas las relaziuns cun l’exteriur. Perquai che la segirtad alimentara saja era dependenta d'imports.
Ils purs èn oz impressaris e nus vulain dar ad els dapli libertads uschè ch'els possian manar lur interpresa cun success en il futur. Cun quest artitgel è quai il cas.
Opposiziun a la cuntraproposta na datti nagina. Il project da votaziun vegn sustegni da tut las partidas. Il suveran svizzer decida ils 24 settember sur da la segirtad alimentara.
RR actualitad 17:00