Mez mars ha il Cussegl federal activà per l’emprima giada l’uschenumnà «status da protecziun S» per fugitivs da l’Ucraina. Uss lascha la Confederaziun analisar quest status da protecziun. E quai dad ina gruppa externa sut la direcziun da l’anteriur cusseglier guvernativ dal chantun Argovia Urs Hoffmann. La ministra da giustia Karin Keller Sutter di, ch’ins stoppia emprender svelt da las experientschas en connex cun il «status da protecziun S»:
La finamira dal status è da proteger spert ed a moda nunbirocratica fugitivs. Enfin uss han bunamain 60'000 persunas survegnì il «status da protecziun S». El vala per in onn. Sch’el vegn lura prolungà, n’è anc betg cler.
Bleras dumondas avertas
Co i va vinavant cun ils fugitivs da l'Ucraina, è cumplettamain avert. Il mument giajan las cifras enavos. Quai saja dentant be in purtret dal mument. La situaziun po sa midar fitg svelt. Il secretariat da stadi per migraziun SEM ha discurrì da 120'000 persunas che pudessan vegnir pervi da la guerra en Svizra. Ils chantuns elavuran plans d'urgenza – tge scenari che vegn la finala a vegnir, n'è dentant betg previsibel.
Il matg avevan la Confederaziun ed ils chantuns tratg in'emprima bilantscha positiva. Tut en tut hajan ins sut controlla la situaziun, er sche bler saja nov.