Bleras persunas ch'èn vegnidas en Svizra sajan traumatisadas da quai ch'ellas hajan vis e fatg atras pervia da l'attatga da la Russia sin lur patria. Quellas persunas – tranter ellas era blers uffants – dovrian agid. Il problem saja dentant la mancanza da persunas qualifitgadas en Svizra e la barriera da lungatg, di Sandra Locher Benguerel. Tranter las persunas ch'han stuì fugir dettia era medias, psicologas e persunal da tgira ch'i fiss tenor la cussegliera naziunala opportun d'engaschar.
![Sandra Locher Benguerel.](https://www.rtr.ch/static/cms/images/960w/b8f515.jpg)
Leschas che stattan enta pe
Il problem sajan dentant las leschas svizras che pretendian tranter auter ina scolaziun da trais onns en Svizra e bunas cumpetenzas d'ina lingua naziunala. Sandra Locher Benguerel vul perquai savair dal Cussegl federal tge pussaivladads ch'i dettia per integrar quellas persunas en la tgira.
L'interpellaziun vegn sustegnida da commembras e commembers da tuttas partidas sco era da l'uniun da las medias e medis d'uffants da la Svizra.