Sco ins ha fin uss repartì fugitivas e fugitivs, ha chaschunà che chantuns urbans han prendì si surproporziunalmain dapli persunas ch'auters chantuns, scriva il Secretariat da stadi per migraziun (SEM). Problematic saja quai surtut en vista a la situaziun d'abitaziuns, ch'èn gia stgarsas en ils chantuns urbans.
Perquai ha il stab spezial decidì che quellas persunas che n'han anc nagina colliaziun privata tar ils giastaders, duain vegnir repartids a moda consequenta sin tschels chantuns, per uschia pudair sminuir tant sco pussaivel quest dischequiliber.
Excepziuns be en paucs cas
Er tar persunas ch'inditgeschan da gia avair in alloschi privat, duai la clav da repartiziun vegnir resguardada. Giavischs motivads fitg bain, vegnian dentant resguardads sche pussibel. Il stab spezial ha plinavant decidì che giavischs per midar chantun, duain vegnir lubids be excepziunalmain. Sco exempels numna il SEM, sch'i giaja per laschar ensemen il coc d'ina famiglia u per pudair ir a lavurar en in lieu ch'è lunsch davent.
Persunas fitg vulnerablas so orfens u persunas cun impediments, ch'èn entrads en Svizra sco gruppa, duain sche pussibel adina vegnir ensemen sut in tetg e tgirads communablamain. Per quellas persunas vegn mintgamai tschertgada la meglra schliaziun, independent da la clav da repartiziun. Il dischequiliber duai vegnir gulivà sur il temp.