Siglir tar il cuntegn
Inhalt

Svizra Fugitivs minorens fatschentan directurs socials

La conferenza dal directurs socials chantunals è quest onn stada a Scuol. En il focus da las discussiuns èn stads ils fugitivs minorens. Er ha la conferenza deliberà recumandaziuns per sviluppar enavant la politica d’uffants e giuvenils en Svizra.

Fugitivs emprendan en scola.
Legenda: Persunas minorenas n'èn betg creschids. Quai è il punct da basa per tut las recumandaziuns da la conferenza. Keystone/Archiv

Il 2015 han 2’736 fugitivs minorens dumandà per asil en Svizra. Quai è in augment considerabel cumpareglià cun il 2014, cura che quai eran anc 795 persunas.

Alloschament dals fugitivs sco gronda sfida

La conferenza dals directurs socials chantunals ha uschia cuntinuà la revisiun da las directivas e deliberà recumandaziuns davart il tractament da fugitivs minorens. Per ils chantuns è cunzunt l’alloschament dals uffants e giuvenils in punct problematic.

Igl è previs da stgaffir standards minimals en tuts chantuns per l’alloschament, l’accumpagnament e la represchentanza giuridica dals fugitivs minorens betg accumpagnads.

Sviluppar enavant politica d'uffants e giuvenils

Sco quai che la conferenza communitgescha ha ella vinavant deliberà recumandaziuns per sviluppar enavant la politica d'uffants e giuvenils en ils chantuns.

Sco giast ha era il cusseglier federal Alain Berset discutà cun ils represchentants dals chantuns davart il dialog naziunal da la politica sociala. Sin invit dal chantun Grischun ha la conferenza tegnì sia dieta annuala a Scuol.

RR novitads 16:00