Siglir tar il cuntegn

Header

cuntegn

Fundà task force Confederaziun e scienza vulan collavurar pli ferm

La Confederaziun vul cumpigliar pli ferm la scienza en il cumbat cunter la pandemia dal coronavirus. Perquai ha la Confederaziun installà ina task force en la quala las scolas autas èn cumpigliadas cun perscrutaders e perscrutadras sco represchentants.

Il gremi da cussegliaziun scienzià haja in grond potenzial en il cumbat encunter il coronavirus, ha ditg Daniel Koch da l'Uffizi federal da sanadad BAG. Manada vegn la task force dal president dal cussegl da perscrutaziun naziunal dal Fond naziunal svizzer, Matthias Egger. Questa task force duai cussegliar il Cussegl federal, il minister da l'intern Alain Berset u ils stabs da la Confederaziun e dals chantuns.

Purtret da Matthias Egger.
Legenda: Matthias Egger, president dal cussegl da perscrutaziun naziunal dal Fond naziunal svizzer duai manar la task force. Keystone

La pandemia mettia la Svizra davant grondas sfidas en il sistem da sanadad, hai num en la communicaziun. La cuminanza da scienziads possia gidar per che la crisa vegnia influenzada a moda positiva, saja quai entras la perscrutaziun, la furmaziun u entras il transfer da savida.

La task force stat era a disposiziun per cussegliar las autoritads chantunalas. Las lavurs previsas vegnian finanziadas sur il budget regular da las organisaziuns cumpigliadas. Nua adina pussaivel duain ils meds finanzials sco emprim vegnir dals budgets regulars da la perscrutaziun ed innovaziun.

Artitgels legids il pli savens

Ir a sanester Ir a dretg